黃偉民之癸巳蛇年前因後果(5) ── 擺個旺財桃花風水局
新年流流，碰親面，都會有朋友叫，喂，師傅，幫我擺個風水局吖。有人要旺財，有人想桃花。
玄空風水，要複雜，可以好複雜。始終名相多，歷代業者，又故作神秘。流落江湖，又成為𧦠神騙神嘅謀生伎倆。
要簡單，又不外乎幾個大原則。守住原則，不中，亦不遠矣。
風水，要形理兼備。
形，就是易經所講嘅象，以象取卦，亦即係"說卦傳"嘅象義引伸。
理，即係理氣。
以洛書嘅後天八卦為依歸。
卦雖然只有八，但打從起首，五土就一直隱含其中，所以數字有九。
蔣大鴻話：欲明八宅之真，先識九宮之數。年分甲子，運轉三元。
三元九運之中，依家行到下元八運。
理氣，要量度坐向，用嘅工具，叫羅庚，即係依家嘅指南針。
家家坐向唔同，傢俬擺設有別。同一間屋，我住係離宮門，但你住，由於梳化攞咗門嘅左邊，立即變咗巽宮門。
而且，家家水路唔同，你先入廚房，我去梳化除鞋，有人先入廁所洗手。所以，理氣一環，不能一概而論。但係以象取卦，則標準如一。
八運之中，以八白為生旺嘅氣，佢嘅象，就係整潔，尊貴陶瓷。但係稍為過火，就會變為孤芳自賞，自閉。
門口，為出入必經之處，唔能夠雜亂，一亂，就變坤卦，二黑，主吝嗇，生病。
長走廊冲埋門口，係震卦，三碧，主官非，鬥爭。一盞長明燈，將三碧嘅木，由火化為土。
山主人丁水主財，要財源滾滾，起碼，由門到廳，由廳到房，要暢通無阻。好多屋企，行步路都難，傢俬雜物，亂放一通，又奌發財吖？
好似以前DBC，由門口行到盡，先到大班魔記間房，條路俾同事坐到背脊貼背脊，根本冇路，水路死咗，又奌進財呢？
Search